ພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ຈັດກອງປະຊຸມຜູ້ບໍລິຫານສຶກສາ ແລະ ກິລາ ທົ່ວແຂວງໄຊສົມບູນ ປະຈຳສົກປີ 2016-2017 ຂຶ້ນຢ່າງເປັນທາງການ ໃນວັນທີ 15 ສິງຫາ ທີ່ຜ່ານມາ ຢູ່ສະໂມສອນສຶກສາທິການເມືອງລ້ອງຊານ ໂດຍການໃຫ້ກຽດເຂົ້າຮ່ວມຂອງທ່ານ ປອ ທອງລອຍ ສິລິວົງ ກໍາມະການສູນກາງພັກ,ເຈົ້າແຂວງໄຊສົມບູນ, ມີບັນດາຫົວໜ້າພະແນກສຶກສາທິການ ແລະ ກິລາແຂວງ, ເຈົ້າເມືອງ, ແຂກຖືກເຊີນຈາກພະແນກການ, ກຸ່ມວັດທະນະທຳ-ສັງຄົມ, ຜູ້ບໍລິຫານການສຶກສາຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງ ຂອງກອງປະຊຸມ ເພື່ອສະຫຼຸບການຈັດຕັ້ງປະຕິບັດວຽກງານການພັດທະນາວຽກງານສຶກສາ ແລະ ກິລາ ໃນໄລຍະ 1 ປີຜ່ານມາ ຕິດພັນກັບວຽກງານ 3 ສ້າງ ພ້ອມທັງ ກຳນົດກິດຈະກຳໜ້າວຽກທີ່ຈະຕ້ອງສູ້ຊົນ ແກ້ໄຂສິ່ງທ້າທາຍ ແລະ ຂໍ້ຄົງຄ້າງ ເພື່ອເພີ່ມທະວີໃຫ້ວຽກງານການສຶກສາ ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ແນໃສ່ພັດທະນາຊັບພະຍາກອນມະນຸດໃຫ້ມີຄຸນນະພາບ, ຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ,ຮອງຮັບແຜນຍຸດທະສາດການພັດທະນາເສດຖະກິດ-ສັງຄົມຂອງແຂວງ ແລະ ແຜນນະໂຍບາຍ, ຄາດໝາຍ ແລະ ຍຸດທະສາດຂອງການພັດທະນາ ແລະ ສຶກສາກິລາ 5 ປີ ຄັ້ງທີ 8 (2016-2020).
ໃນໂອກາດດັ່ງກ່າວ ຜູ້ແທນກອງປະຊຸມໄດ້ພ້ອມກັນປະເມີນຕີລາຄາຕໍ່ບົດສະຫຼຸບ ແລະ ທິດທາງແຜນການໃນຕໍ່ໜ້າ ການຈັດຕັ້ງປະຕິບັດສອບເສັງຈົບຊັ້ນ ມ 4 ແລະ ມ7 ເປັນຕົ້ນ ເພີ່ມທະວີປັບປຸງຄຸນນະພາບການຮຽນ-ການສອນ, ສູ້ຊົນໃຫ້ອັດຕາການເຂົ້າຮຽນເພີ່ມຂຶ້ນຄຽງຄູ່ກັບອັດຕາປະລະ ອັດຕາຄ້າງຫ້ອງໃຫ້ຫຼຸດລົງ, ສ້າງໃຫ້ມີໂຮງຮຽນມັດທະຍົມພາຍໃນແຂວງ ທີ່ມີເງື່ອນໄຂເປັນໂຮງຮຽນຕົວແບບດ້ານການຮຽນ-ການສອນ.
ຈາກນັ້ນ ຍັງໄດ້ມີການມອບຫຼຽນໄຊແຮງງານຊັ້ນ 3, ໃຫ້ກັບໂຮງຮຽນມັດທະຍົມສົມບູນ ແລະ ຄູ-ອາຈານ ທີ່ເປັນຕົວແບບທາງດ້ານການສິດສອນ ແລະ ໂຮງຮຽນປອດຢາເສບຕິດຂຶ້ນ ຄື: ຫຼຽນໄຊແຮງງານຊັ້ນ 3, ມີ 2 ໂຮງຮຽນ, ລວມມີ 2 ຫຼຽນ, ບຸກຄົນ 2 ທ່ານ, ຫຼຽນໄຊແຮງງານຊັ້ນ 3, ມີ 10 ໂຮງຮຽນ, ລວມມີ 10 ຫຼຽນ, ບຸກຄົນ 10 ທ່ານ ແລະ ກອງປະຊຸມແມ່ນໄດ້ດໍາເນີນເປັນເວລາ 3 ວັນຈຶ່ງຈະສໍາເລັດ.

Editor: ດາວໄຊ ສີວິໄລ