ທ່ານ ຄໍາພຽງ ແກ້ວລັງສີ, ອໍານວຍການສູນພັດທະນາ ແລະ ທົດສອບສີມືແຮງງານ ເວດສະພົງ ໃຫ້ສຳພາດກັບຜູ້ສື່ຂ່າວລາຍການເມືອງລາວວັນນີ້ ວ່າ: ສູນແຫ່ງນີ້ແມ່ນເລັ່ງໃສ່ເຝິກ ອົບຮົມສີມືແຮງງານ ໃຫ້ໄດ້ 5 ລະດັບຄື: ວິຊາບັນຊີຂັ້ນພື້ນຖານ, ສືມືແຮງງານ ເຄິ່ງສຳນານງານ, ຜູ້ຊຳນານງານ, ນາຍຊ່າງ ແລະ ຜູ້ຄຸມງານ. ເຝິກອົບຮົມມີໄລຍະເວລາ 6 ເດືອນ, .ໃນນັ້ນ ພາກທິດສະດີກວມ 20% ແລະ ພາກປະຕິບັດຕົວຈິງກວມ 80% ດ້ວຍການລົງເຝິກງານຕົວຈິງຕາມໂຮງງານຕ່າງໆ, ໂດຍເລັ່ງໃສ່ ຊາວໜຸ່ມທີ່ຈົບຈາກວິຊາຊີບ ແລະ ພະນັກງານທີ່ມາຈາກຂະແໜງການ ແລະ ທ້ອງຖິ່ນຕ່າງໆ ໂດຍຈະຂໍທຶນຈາກອົງການສາກົນເຂົ້າມາອຸດໜູນ ນັບທັງຄູ-ອາຈານຈາກສະຖາບັນອາຊີວະ ແລະ ສູນຕ່າງໆເຂົ້າມາສິດສອນ ແລະ ພາຍຫຼັງຮຽນສໍາເລັດແລ້ວ ທາງສູນຈະຊ່ວຍຊອກວຽກເຮັດງານທຳໃຫ້ເປັນຢ່າງດີ.
ສໍາລັບ ຜູ້ທີ່ສໍານານງານແລ້ວ, ມີວຽກເຮັດງານທຳແລ້ວ ແຕ່ບໍ່ມີໃບຢັ້ງຢືນສີມືແຮງງານ ສາມາດເຂົ້າມາທົດສອບສີມື ເອົາໃບຢັ້ງຢືນນຳສູນແຫ່ງນີ້ໄດ້, ເພື່ອສາມາດເຊືອມໂຍງສີມືແຮງງານໃນອາຊຽນ ແລະ ໃນການຮັບສະໝັກທາງສູນ ໄດ້ມີການສຳພາດ ແລະ ທົດລອງຕົວຈິງ. ດັ່ງນັ້ນ ຈຶ່ງຂໍເຊີນຊວນຜູ້ທີ່ມີຄວາມສົນໃຈໃນອາຊີບດັ່ງກ່າວໃຫ້ເຂົ້າມາສຶກສາຮໍ່າຮຽນ ເພື່ອສາມາດ ພັດທະນາສີມືແຮງງານຂອງຕົນດີຂຶ້ນ ແລະ ໃນຕໍ່ໜ້າ ສູນພັດທະນາ ແລະ ທົດສອບສີມືແຮງງານເວດສະພົງ ມີແຜນຈະພັດທະນາຕົນເອງຫຼາຍຂຶ້ນ ໂດຍໄດ້ຮັບການຮ່ວມມືຈາກກົມອຸດສາຫະກຳ ແລະ ຫັດຖະກຳ ຂອງກະຊວງ ອຸດສາຫະກຳ ແລະ ການຄ້າ ທາງດ້ານທຶນຮອນ, ແລະ ອົງ ການໃຈກ່າ ຂອງປະເທດຍີປຸ່ນ, ທີ່ໄດ້ເລືອກເອົາສູນເວດສະພົງ ແລະ ບໍລິສັດ ມູນເທວາ ເປັນ ບ່ອນພັດທະນາ ແລະ ຜະລິດເຄື່ອງໄມ້ທີ່ມີຄຸນນະພາບ ອອກຈໍາໜ່າຍອີກດ້ວຍ.

Editor: ຕະວັນ ແສງສະຫວັນ