ວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາ ແລະ ອະນຸລັກສັດນ້ຳ-ສັດປາແຫ່ງຊາດ, ມາຮອດປະຈຸບັນເຫັນໄດ້ວ່າ ວຽກງານດັ່ງກ່າວໄດ້ກາຍເປັນຂະບວນການຂອງທົ່ວປວງຊົນ ແລະ ຫຼາຍພາກສ່ວນໃນສັງຄົມ ກໍ່ໄດ້ມີສ່ວນຮ່ວມເປັນຢ່າງດີ, ເປັນການປະກອບສ່ວນເຂົ້າໃນສັງຄົມຢ່າງຕັ້ງຫນ້າ ມີຄວາມເຂົ້າໃຈກ່ຽວກັບຄວາມໝາຍ, ຄວາມສຳຄັນ ຂອງການຄຸ້ມຄອງຊັບພະຍາກອນປ່າ ແລະ ສັດນ້ຳ ໃຫ້ມີຄວາມຍືນຍົງ. ລວມທັງເປັນການປະກອບສ່ວນໃນການພັດທະນາ ຂະແໜງການປະມົງ ໃຫ້ສາມາດບັນລຸຄາດໝາຍສູ້ຊົນຕ່າງໆ ທີ່ໄດ້ວາງອອກ, ເປັນການປະກອບສ່ວນຕໍ່ບັນດາແຜນງານບຸລິມະສິດຂອງ ກະຊວງກະສິກຳ ແລະ ປ່າໄມ້ ກໍຄື ຂອງລັດຖະບານ ໃນການຄ້ຳປະກັນດ້ານສະບຽງອາຫານ, ການລຶບລ້າງຄວາມທຸກຍາກ ແລະ ກ້າວໄປສູ່ການນຳເອົາປະເທດຊາດຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາໃນປີ 2020. ໄດ້ຢ່າງຊິ້ນເຊີງ

ສະເພາະ ການວາງຄາດໝາຍໃນຂອບເຂດທົ່ວປະເທດ ກ່ຽວກັບການປ່ອຍປາ ລົງສູ່ແຫຼ່ງນ້ຳ ໃນທຳມະຊາດ ເຊັ່ນ: ແມ່ນ້ຳຂອງ ແລະ ແມ່ນ້ຳສາຂາຕ່າງໆ, ອ່າງເກັບນ້ຳໃນເຄື່ອນໄຟຟ້າ, ອ່າງເກັບນ້ຳຊົນລະປະທານ, ບັນດາໜອງ ແລະ ເຊດບຶງນ້ຳໃນທຳມະຊາດ, ໜອງປາຊຸມຊົນ ແລະ ດິນບໍລິເວນນ້ຳ ປະເພດຕ່າງໆ ໃຫ້ເປັນຂະບວນຟົດຟື້ນ. ເພື່ອເຮັດໃຫ້ການຈັດຕັ້ງປະຕິບັດ ຂະບວນການດັ່ງກ່າວ ມີຜົນສຳເລັດ, ທາງພາກສ່ວນກ່ຽວຂ້ອງໂດຍສະເພາະກົມລ້ຽງສັດ ແລະ ການປະມົງໄດ້ຮຽກຮ້ອງໃຫ້ປະຊາຊົນ ຫັນມາເຫັນຄວາມສຳຄັນຂອງການອະນຸລັກສັດນ້ຳ-ສັດປ່າ, ການປົກປັກຮັກສາ, ຄຸ້ມຄອງ ແລະ ພັດທະນາການປະມົງແບບຍືນຍົງ ແລະ ປຸກລະດົມຂົນຂວາຍອົງການຈັດຕັ້ງທັງພາກລັດ ແລະ ພາກເອກະຊົນ ໃນການຈັດກິດຈະກຳຕ່າງໆ ເອົາໃຈໃສ່ປ່ອຍປາລົງໃສ່ໜອງ, ບຶງ, ແມ່ນ້ຳລຳເຊ, ອ່າງນ້ຳ,  ຕາມທຳມະຊາດ, ຫລື ບັນດາເຂື່ອນໄຟຟ້ານ້ຳຕົກ, ແຫຼ່ງທ່ອງທ່ຽວນ້ຳຕົກຕາດຕ່າງໆ, ລວມທັງການປ່ອຍສັດປ່າ ທີ່ໄດ້ມາຈາກການເພາະພັນ, ການຢຶດຈາກການຫາ, ການລ່າ ຫຼື ການຄ້າຂາຍສັດປ່າ ທີ່ຜິດກົດໝາຍ, ປ່ອຍເຂົ້າໃນປ່າສະຫວຽນຕ່າງໆຄືນສູ່ທຳມະຊາດ ທີ່ເຫັນວ່າມີຄວາມປອດໄພ ແລະ ສາມາດອອກແມ່ແຜ່ລູກໄດ້ໃຫ້ເປັນຂະບວນກ້ວາງຂວາງ, ທັງນີ້ ຍັງເນັ້ນຍ້ຳຫ້າມບໍ່ໃຫ້ຈັບ, ຫ້າມຊື້-ຂາຍ ສັດນ້ຳ ແລະ ລ່າສັດປ່າ ປະເພດຫວງຫ້າມ ທີ່ຍັງມີຊີວິດ, ຊາກ ຫລື ຊິ້ນສ່ວນ ແລະ ອະໄວຍະວະຕ່າງໆ ຂອງສັດ ອອກຈາກຖິ່ນທີ່ຢູ່ອາໃສ ຫຼື ແຫຼ່ງກຳເນີດ ມາໄວ້ໃນຄອບຄອງ ກໍລະນີພົບເຫັນຜູ້ລະເມີດ ໃນຂໍ້ຫ້າມດັ່ງກ່າວ ຫາກຝ່າຝືນແມ່ນຈະດຳເນີນມາດຕະການ ກ່າວເຕືອນ-ສຶກສາອົບຮົມ, ປັບໄໝດຳເນີນຄະດີ ຕາມແຕ່ລະກໍລະນີໜັກ-ເບົາ ທີ່ໄດ້ກຳນົດໄວ້ ໃນກົດໝາຍວ້າດ້ວຍການປະມົງ ແລະ ກົດໝາຍວ່າດ້ວຍການຄຸ້ມຄອງສັດສັດນ້ຳສັດປ່າ ຂອງ ສປປ ລາວ